ရွှေ့ပြောင်း မြန်မာအလုပ်သမားများအရေး ဆောင်ရွက်နေကြောင်း အစိုးရ ထုတ်ပြော

ထိုင်းနိုင်ငံရောက် မြန်မာ ရွှေ့ပြောင်း အလုပ်သမားများ၏ ရပိုင်ခွင့်များ အပြည့်အဝ ရရှိရေး အတွက် အကာ အကွယ် ပေးနိုင်ရန် ဆောင်ရွက်လျက် ရှိကြောင်း မြန်မာ အစိုးရ အလုပ် သမားရေးရာ တာဝန်ရှိသူများက ပြောဆို လိုက်သည်။
“ပြည်တွင်းမှာ ရှိသော အလုပ်သမားများ၏ အခွင့် အရေးသာ မက ပြည်ပမှာ လုပ်ကိုင်နေသော မြန်မာနိုင်ငံသား အလုပ်သမား များ၏ တရားဝင် အခွင့်အရေးများ အပြည့်အဝ ရရှိနိုင်ရန် အတွက်ကိုလည်း ကြိုးပန်းဆောင်ရွက်သွားမည်” ဟု ပြည်ပတွင် အလုပ်လုပ်ကိုင်မှု ကြီးကြပ်ရေးကော်မတီ ဒုတိယ ဥက္ကဋ္ဌ နယ်စပ်ရေးရာ ဌာနနှင့် မြန်မာ့ စက်မှုဖွံ့ဖြိုးရေး ဝန်ကြီးဌာန ပြည်ထောင်စု ဝန်ကြီး ဒုတိယ ဗိုလ်ချုပ်ကြီး သိန်းဌေးက ပြောဆိုကြောင်း နိုင်ငံပိုင် ကြေးမုံ သတင်းစာတွင် ယနေ့ ဖော်ပြထားသည်။
ယမန်နေ့က နေပြည်တော် အလုပ်သမားဝန်ကြီးဌာန ခန်းမ၌ ကျင်း ပြုလုပ်သော အစည်းအဝေးတွင် ထိုင်းနိုင်ငံတွင်း တရားဝင် နေထိုင် အလုပ်လုပ်ကိုင်နိုင်ရေးအတွက် ယာယီ နိုင်ငံကူး လက်မှတ်များ ထုတ်ပေးနေသကဲ့သို့ အထောက်အထား မရှိ၍ ပြန်ပို့ ခံရသော အလုပ်သမား များကိုလည်း လူကုန်ကူးမှု မခံရစေရေးအတွက် လုပ်ဆောင်နေကြောင်း ပြည်ထောင်စု ဝန်ကြီးများက ပြောဆိုကြသည်။
အထောက်အထား မရှိ၍ ဖမ်းဆီးပြီး မြန်မာနိုင်ငံ နယ်စပ်မြို့များသို့ ပြန်ပို့ခံရမည်ဖြစ်သော ရွှေ့ပြောင်းအလုပ်သမား များအတွက် စနစ်တကျ ပြန်လည် လက်ခံနိုင်ရန် တာချီလိတ်၊ မြဝတီနှင့် ကော့သောင်းတို့တွင် စခန်းများ ဖွင့်လှစ်ထားကြောင်း၊ ပြည်ပတွင် အလုပ်လုပ်ကိုင်မှု ကြီးကြပ်ရေးကော်မတီ ဒုတိယ ဥက္ကဋ္ဌ၊ အလုပ်သမားဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ပြည်ထောင်စုဝန်ကြီး ဦးအောင်ကြည်က ဆိုသည်။
ထိုင်းနိုင်ငံရောက် မြန်မာအလုပ်သမား ၂ သန်းကျော်အနက် ၁ သန်းကျော်ကို တရားဝင် နေထိုင်လုပ်ကိုင်ခွင့် အထောက် အထားများ လုပ်ဆောင်ထားပေးပြီးဖြစ်ကြောင်း၊ ထိုသို့ ထုတ်ပေးနိုင်ရန် ၂၀၁၂ ဖေဖော်ဝါရီလက စတင်၍ အဖွဲ့ ၅ ဖွဲ့ ဖွဲ့ကာ လုပ်ဆောင် ပေးလျက်ရှိပြီး ၎င်းတို့နှင့် လဲလှယ်၍ တာဝန်ထမ်းဆောင်ရန် နောက်ထပ်ပို့ဆောင်မည့် အစိုးရဝန်ထမ်း ၄၀ ကိုလည်း မြန်မာအလုပ်သမား ကူညီစောင့်ရှောက်ရေး ဆိုင်ရာ မွမ်းမံ သင်တန်းများ ပေးလျက်ရှိကြောင်း သိရသည်။
ယခင်က ထိုင်းနိုင်ငံရောက် မြန်မာရွှေ့ပြောင်း အလုပ်သမားများ၏ ဖိနှိပ်ခံရမှုများ၊ အလုပ်သမား ရပိုင်ခွင့်များကို မြန်မာ အစိုးရက ထိထိ ရောက်ရောက် လုပ်ဆောင်ပေးခြင်းမရှိသဖြင့် ပြည်ပရောက် အတိုက်အခံ အလုပ်သမားအဖွဲ့အစည်း တချို့၏ အကူအညီ ရသူများမှ လွဲ၍ အများစုမှာ လုပ်ခလစာ ခေါင်းပုံဖြတ်ခံရခြင်း အပါအဝင် ဖိနှိပ်မှုအမျိုးမျိုး တွေ့ကြုံခံစား ခဲ့ကြရသည်။
ရွှေ့ပြောင်း မြန်မာအလုပ်သမားများကို တရားဝင်နေထိုင် အလုပ်လုပ်ကိုင် နိုင်ရန်အတွက် မြန်မာအစိုးရက လုပ်ဆောင် ပေးမည်ဆိုလျှင် ကောင်းမွန်ကြောင်း၊ သို့သော် အလုပ်သမားများထံမှ တန်ကြေးထက်ပိုသော ငွေကြေးကို ပွဲစားများက တောင်းယူနေမှုအား မြန်မာအစိုးရအနေဖြင့် ကိုင်တွယ်ဖြေရှင်းပေးရန် လိုကြောင်း ထိုင်းအခြေစိုက် ရောင်ခြည်ဦး အလုပ်သမား များ အဖွဲ့ အတွင်းရေးမှူး ဦးမိုးဆွေက ပြောသည်။
“အရင် အလုပ်သမားတွေက နယ်စပ်တွေကို ဆင်းလုပ်ရတယ်။ အခု မြန်မာအစိုးရက သူတို့နေတဲ့ ဒေသတွေမှာ လာပြီးတော့ လုပ်ပေးတယ်ဆိုတော့ အရင်ထက်စာရင် ကုန်ကျမှု သက်သာသွားသင့်တယ်။ အခု အဲဒီလို မဟုတ်ဘဲ ပွဲစားတွေက လက်မှတ် ခရမ်းရောင်ပြောင်းသွားတယ်၊ ပိုပြီးတော့ အဆင့်မြင့်သွားတယ် ဆိုတဲ့ အကြောင်းပြချက်နဲ့ ၅၀၀ တန်ရင် ၁၀၀၀ လောက် တောင်းနေတာတွေ ရှိနေတယ်။ ဒီကိစ္စကို အစိုးရက ဖြေရှင်းရလိမ့်မယ်” ဟု သူက ဆိုသည်။
တရားဝင် နေထိုင်လုပ်ကိုင်ခွင့် အထောက်အထားများ ပြုလုပ်ပေးသည့်အပြင် အလုပ်သမားများ၏ ရပိုင်ခွင့် အခွင့်အရေး များကိုလည်း လုပ်ဆောင်ပေးမည်ဆိုသည့် အစိုးရ၏ စီစဉ်မှုကို ဦးမိုးဆွေက ကြိုဆိုကြောင်း၊ ထိုဖြစ်ရပ်သည် ထိုင်းတနိုင်ငံလုံး တွင် မြန်မာ အလုပ်သမားများ ကြုံတွေ့နေသော အခြေအနေဖြစ်ကြောင်း ဆက်ပြောသည်။
“ထိုင်းရောက်နေတဲ့ မြန်မာအလုပ်သမား အများစုကြုံနေရတာ၊ အထူးသဖြင့် မဲဆောက်လို နေရာမျိုးမှာ ထိုင်းအစိုးရရဲ့ သတ်မှတ်ထားတဲ့ လုပ်အားခ၊ အလုပ်ချိန် သတ်မှတ်ချက်တွေ မရရှိကြဘူး။ အခွင့်အရေးတွေက ဆက်ပြီးတော့ ဆုံးရှုံး နေဆဲပဲဖြစ်တယ်။ ဒီအခွင့်အရေးတွေကို ဥပဒေအတိုင်း ဖြစ်အောင် လုပ်ပေးဖို့လိုတယ်” ဟု ဦးမိုးဆွေက ရှင်းပြသည်။
ထိုသို့ မြန်မာအလုပ်သမားများ၏ အခက်အခဲများကို လုပ်ဆောင်နိုင်ရန်အတွက် ထိုင်းနိုင်ငံအတွင်း မြန်မာအစိုးရက လာရောက် ဖွဲ့စည်းပေးထားသော အဖွဲ့များ၏ ဆက်သွယ်ရမည့် ဖုန်းနံပတ်များကို အလုပ်သမားများ အကြား ကျယ်ကျယ်ပြန့်ပြန့် သိစေရန် လုပ်ဆောင်ဖို့ လိုအပ်ကြောင်း၊ လက်ရှိအနေအထားတွင် မြန်မာသံရုံးသို့ ဆက်သွယ်ရာ၌ပင် ဖုန်းမကိုင်သည့်အချိန်က များနေကြောင်း ၎င်းက ထောက်ပြသည်။
အလုပ်သမားများ အရေးလုပ်ဆောင်ရန် လက်ရှိ မြန်မာအစိုးရက တာဝန်ပေးထားသော လူဦးရေ ဆယ်ဂဏန်းခန့်မှာ ထိုင်းနိုင်ငံတွင် သန်းချီရှိနေသော မြန်မာအလုပ်သမားများ အရေးကို ဖြေရှင်းပေးရန် အင်အားမလုံလောက်ကြောင်း ထိုင်းနိုင်ငံရောက် မြန်မာနိုင်ငံသားများအဖွဲ့ (BAT) ၏ ခေါင်းဆောင် ဦးကျော်သောင်းက ဧရာဝတီသို့ ပြောသည်။
မေလကုန်ပိုင်းက ဘန်ကောက်တွင် ကျင်းပနေသည့် ၂၀၁၂ ခုနှစ် အရှေ့ အာရှဆိုင်ရာ ကမ္ဘာ့စီးပွားရေး ညီလာခံသို့ တက်ရောက်ရန် ရောက်ရှိလာသော အမျိုးသားဒီမိုကရေစီအဖွဲ့ချုပ် (NLD) ဥက္ကဋ္ဌ ဒေါ်အောင်ဆန်းစုကြည်က မြန်မာရွှေ့ပြောင်း အလုပ်သမားများ၊ အလုပ်သမားအရေး ဆောင်ရွက်သူ အဖွဲ့များနှင့် တွေ့ဆုံခဲ့သည်။
၎င်းနောက် မြန်မာ အလုပ်သမားများ ရပိုင်ခွင့်များနှင့် ပတ်သက်၍ ထိုင်းအစိုးရ တာဝန်ရှိသူတချို့နှင့် တွေ့ဆုံ ဆွေးနွေးခဲ့ရာ နောက်တနေ့တွင် ထိုင်းနိုင်ငံသားများနှင့်အတူ တရားဝင် လုပ်ကိုင်နေသည့် မြန်မာနိုင်ငံသားများကို တနေ့ လုပ်အားခ ဘတ်ငွေ ၃၀၀ (၁၀ ဒေါ်လာ) ရရှိရန် ၂၀၁၃ ဖေဖော်ဝါရီလ ၁ ရက်နေ့မှ စတင် ဆောင်ရွက်ပေးမည်ဟု ထိုင်း ဒု ၀န်ကြီးချုပ် ချလုံ ယူဘမ်ပရုန်းက ပြောခဲ့သည်။

Ref>>> burma.irrawaddy.org