Monday, August 08, 2016

လူအခွင့်အရေး၊အလုပ်သမားအခွင့်အရေး လိင်နဲ့လိင်ကွဲပြားမှု အခြေပြုသင်တန်းပြုလုပ်


\သြ ဂုတ်လ ၅. ၂၀၁၆

ရောင်ခြည်ဦးအလုပ်သမားများအဖွဲ့က ဦးဆောင်ပြီး လူ့အခွင့်အရေး အလုပ်သမားအခွင့်အရေး၊ လိင်နဲ့လိင်ကွဲပြားမှုအခြေပြုသင်တန်းတရပ်ကို ထိုင်း-မြန်မာနယ်စပ် မဲဆောက်မြို့ တနေရာမှာ သြဂုတ်လ ၅ ရက်နေ့ကစတင်ပြီး သုံးရက်ကြာပြုလုပ်ခဲ့ပါတယ်။ ဒီသင်တန်းကို ရွှေ့ပြောင်းမြန်မာအလုပ်သမား (၁၈)ဦးတက်ရောက်ခဲ့တာဖြစ်ပြီး မြန်မာအလုပ်သမ(၁၇)ဦးပါဝင်တယ်လို့သိရပါတယ်။ အများစုဟာ ကုန်တင်ကုန်ချလုပ်ငန်းမှာ အလုပ်လုပ်ကိုင်နေတဲ့ သူတွေဖြစ်ပါတယ်။ 

သင်တန်းပြုလုပ်ပေးရတာနဲ့ပတ်သက်လို့ “ ကိုယ့်အခွင့်အရေးကို ကိုယ်တိုင်သိနားလည်ပြီး တောင်းဆိုတတ်လာစေဖို့ လိင်ကွဲပြားမှုအရ အမျိုးသမီးတွေကို ခွဲခြားဆက်ဆံတာတွေ လူမှုအသိုင်းအ၀ိုင်းမှာ မရှိစေဖို့ ရည်ရွယ်ချက်တွေနဲ့ ပြုလုပ်ပေးခဲ့တာလို့” သင်တန်းဖြစ်မြောက်ရေး ဦးဆောင်သူတွေက ပြောပါတယ်။
 
သင်တန်း ပထမရက်မှာ လူ့အခွင့်အရေးနဲ့ပတ်သက်တဲ့ မွေရာပါလူ့အခွင့်အရေး၊ လူ့အခွင့်အရေး ကြညာစာတမ်းပါ လူ့အခွင့်အရေးအပိုဒ်၃၀စလုံးကို သင်တန်းဆရာ ကိုမျိုးကိုက ဦးဆောင် ပို့ချပေးခဲ့တာဖြစ်ပါတယ်။
 
သင်တန်း ဒုတိယရက်မှာတော့ ရွှေ့ပြောင်းအလုပ်သမားအခွင့်အရေး ဆိုင်ရာတွေကို သင်တန်းဆရာ ကိုစိုးမိုးက ဦးဆောင် ရှင်းလင်း ဆွေးနွေးပေးခဲ့တာဖြစ်ပါတယ်။

သင်တန်း တတိယနေ့မှာတော့ လိင်နဲ့လိင်ကွဲပြားမှုအခြေပြု အသိပညာရပ်တွေကို သင်တန်းဆရာမ ဒေါ်သူဇာကြိုင်က ဦးဆောင်ပို့ချ ဆွေးနွေးခဲ့တာဖြစ်ပါတယ်။

သင်တန်းသားတွေအနေနဲ့ သူတို့ဘ၀အတွက် သိသင့်သိထိုက်တာတွေကို သင်တန်းက ဖြည့်ဆည်းပေးလိုက်တဲ့အတွက် လုပ်ငန်းခွင်အတွင်း အလုပ်သမားရပိုင်ခွင့် အခွင့်အရေးတွေ၊ အမျိုးသမီးတွေအပေါ် လိင်ပိုင်းဆိုင်ရာအရ ခွဲခြားဆက်ဆံခံနေရတဲ့ အခြေအနေတွေကနေ လူအချင်းချင်း ကျားမ တန်းတူအခွင့်အရေးရှိရမယ်ဆိုတဲ့ အချက်တွေကို သိနားလည်ခဲ့ကြတယ်လို့ဆိုပါတယ်။

ရောင်ခြည်ဦးအလုပ်သမားများအဖွဲ့အနေနဲ့ ထိုင်းနိုင်ငံရောက် မြန်မာရွှေ့ပြောင်းအလုပ်သမားထုကြား လူ့အခွင့်အရေး၊ အလုပ်သမားအခွင့်အရေးနဲ့ အလုပ်သမားရပိုင်းခွင့်တွေအတွက် ဥပဒေ အထောက်အကူပြုဌာန ထားရှိပြီး ကူညီဆောင်ရွက်ပေးနေတဲ့ အဖွဲ့အစည်းလည်းဖြစ်ပါတယ်။

Monday, August 01, 2016

(၃)နှစ်အရွယ် ကလေးငယ် ရေတွင်းထဲကျပြီးသေဆုံး


ထိုင်း-မြန်မာနယ်စပ် မဲဆောက်မြို့ မယ်တောင်ကျေးရွာ တွန်းခါရပ်ကွက်မှာ ဖခင်နဲ့အတူ မြက်ရိတ် လိုက်ပါသွားရင်း အသက် (၃)နှစ်အရွယ်ကလေးငယ်တစ်ဦး ရေတွင်းထဲ လိမ့်ကျကာ သေဆုံးမှု ဇူလိုင်လ ၂၇ ရက်နေ့ ညနေပိုင်းကဖြစ်ပွားခဲ့တယ်လို့ စုံစမ်းသိရပါတယ်။ 
 
အခင်းဖြစ်ပွားတဲ့နေ့က ကီလိုကြီး (ခ) မောင်ဇွဲကိုဖြိုးဟာ ဖခင်ဖြစ်သူ ကိုအောင် မြက်ရိတ်သွားရာကို လိုက်ပါသွားခဲ့ပါတယ်။ ဖခင်မြက်ရိတ်တဲ့နေရာနဲ့ မလှမ်းမကမ်း မြက်ခင်းပြင်မှာ ဆော့ကစားနေရင်း မြက်ပင်တွေဖုံးလွှမ်းနေပြီး အကာအရံ မရှိတဲ့ ရေတွင်းနက်ထဲ လိမ့်ကျသေဆုံးခဲ့ရတာဖြစ်ပါတယ်။ ဖခင်ဖြစ်သူ ကိုအောင်ဟာ သားဖြစ်သူ မောင်ဇွဲကိုဖြိုး မြင်းကွင်းကနေပျောက်သွားတဲ့အတွက် နာရီဝက် နီးပါးကြား လိုက်လံရှာဖွေခဲ့ပေမယ့် ကလေးကိုမတွေ့တဲ့အတွက် ကလေးဆော့ကစားတဲ့ နေရာအနီးမှာ ပြန်လည် လာရောက်ရှာဖွေတော့မှ ရေတွင်းကိုတွေ့ရတာဖြစ်ပြီး ရေတွင်းထဲ ဆင်းပြီးရေငုတ်ရှာဖွေတော့မှ ကလေးအလောင်းကို တွေ့ရတာဖြစ်တယ်လို့ လိုက်လံကူညီရှာဖွေပေးခဲ့သူတွေက ပြောပါတယ်။
 
ဇူလိုင်လ ၂၈ရက်နေ့မှာ မောင်ဇွဲကိုဖြိုးရဲ့ ရုပ်အလောင်းကို မဲဆောက်ဆေးရုံကြီးကနေ မယ်တောင်တိုက် သုဿန်ကိုသယ်ဆောင်ပြီး နေ့လယ် (၁၂)နာရီမှာ မဲဆောက်ပရဟိတအသင်းနဲ့ မယ်တောင်တိုက် လူထုအခြေပြုအဖွဲ့က ဦးဆောင်အကူအညီနဲ့ မောင်ဇွဲကိုဖြိုးရဲ့ ရုပ်အလောင်းကို မီးသင်္ဂြိုလ် ပေးခဲ့တာဖြစ်ပါတယ်။ အသက် (၃)နှစ်အရွယ် သေဆုံးသူ ကီလိုကြီး (ခ) မောင်ဇွဲကိုဖြိုးဟာ တောင်ယာစိုက်ပျိုးရေး အလုပ်နဲ့ အသက်မွေးကြောင်းပြုနေတဲ့ မြန်မာနိုင်ငံ ပဲခူးတိုင်း၊ စမ်းမြောင်ကျေးရွာ ဗျက်ကြီးအုပ်စု ကနေ ထိုင်းနိုင်ငံ မဲဆောက်မြို့ကို ၂၀၁၂ ခုနှစ်က ၀င်ရောက်အလုပ်လုပ်ကိုင်နေတဲ့ ကိုအောင်နဲ့ မခိုင်တို့ရဲ့ သားဦးရတနာဖြစ်ပါတယ်။

Saturday, July 30, 2016

အခွင့်အရေးနဲ့ မျိုးဆက်ပွားကျန်းမာရေး အသိပညာရဖို့ အမျိုးသမီးစကားဝိုင်း ပြုလုပ်

30 July 2016

ရောင်ခြည်ဦးအလုပ်သမားများအဖွဲ့က ဦးဆောင်ပြီး ထိုင်း-မြန်မာနယ်စပ် ဟွေ့ကလုတ်ကျေးရွာမှာရှိတဲ့ တောင်ယာလုပ်ငန်းခွင်မှာလုပ်ကိုင်နေတဲ့ မြန်မာရွှေ့ပြောင်းအလုပ်သမားတွေအတွက် အမျိုးသမီးစကားဝိုင်း ပြုလုပ်ခဲ့ပါတယ်။

အမျိုးသမီးစကားဝိုင်းကို ရောင်ခြည်ဦးအလုပ်သမားများအဖွဲ့က ကိုမျိုးကို၊ ကိုစိုးမိုး၊ မသူဇာကြိုင်နဲ့ မေသင်္ကြန်မိုးတို့ (၄)ဦးက အဓိက ဦးဆောင်ပြီး အလုပ်သမားအခွင့်အရေး၊ မျိုးဆက်ပွားကျန်းမာရေးတို့နဲ့ ပတ်သက်တဲ့ အသိပညာ ရရှိစေမယ့် အချက်တွေကို ဆွေးနွေးခဲ့ကြတာဖြစ်ပါတယ်။ အဆိုပါ အမျိုးသမီးစကားဝိုင်းကို တောင်ယာအလုပ်သမ (၁၈)ဦး နဲ့ အမျိုးသား (၃)ဦး တက်ရောက်ခဲ့တာဖြစ်ပါတယ်။

“အသိပညာဗဟုသုတ ကျန်းမာရေးပညာရပ်တွေ လက်လှမ်းမမှီတဲ့ သူတွေအတွက် သူတို့ ရဲ့အခွင့်အရေး အလုပ်သမားအခွင့်အရေးနဲ့ ကျန်းမာရေး အသိပညာတွေရရှိစေဖို့ ရည်ရွယ်ပြီး ဒီလိုအမျိုးသမီးစကားဝိုင်းတွေကို ပြုလုပ်ရတာဖြစ်တယ်”လို့ အမျိုးသမီးစကားဝိုင်းဖြစ်မြောက်ရေး ဦးဆောင်သူက ပြောပါတယ်။

ရောင်ခြည်ဦးအလုပ်သမားများအဖွဲ့ကနေဦးဆောင်ပြီး မဲဆောက်ဒေသတွင်းက မြန်မာရွှေ့ပြောင်းအလုပ်သမားတွေကြား အမျိုးသမီးစကားဝိုင်းတွေ၊ လိင်းနဲ့လိင်ကွဲပြားမှုအခြေပြု သင်တန်းအပါအ၀င် လူ့အခွင့်အရေး၊ အလုပ်သမားအခွင့်အရေးနဲ့ အသက်မွေးဝမ်းကြောင်းအတွက် စက်ချုပ်သင်တန်းတွေ ပို့ချပေးတာမျိုးတွေကိုလည်း ပြုလုပ်ပေးနေတာဖြစ်ပါတယ်။
 
 
 

Friday, July 29, 2016

အဖမ်းအဆီးတွေကြောင့် မဲဆောက် ဈေးထဲက မြန်မာစားသောက်ကုန်ရောင်းချတဲ့ ဈေးဆိုင်တွေ ပိတ်ထား

ထိုင်းနိုင်ငံတ၀ှမ်းမှာ အထောက်အထားမဲ့ ၀င်ရောက်အလုပ်လုပ်ကိုင်နေတဲ့ နိုင်ငံခြားသားအလုပ်သမားတွေကို ထိုင်းစစ်တပ်အပါအ၀င်ရဲနဲ့အဖွဲ့စုံက စစ်ဆေး ဖမ်းဆီးနေတယ်ဆိုတဲ့ သတင်းတွေကြောင့် ထိုင်း-မြန်မာနယ်စပ် မဲဆောက်ဈေး ထဲက မြန်မာစားသောက်ကုန်နဲ့ မြန်မာပြည်သားအလုပ်သမားတွေငှားရမ်းပြီးဈေး ရောင်းချနေတဲ့ဆိုင်တွေ တော်တော်များများ ပိတ်ထားကြတယ်လို့ စုံစမ်းသိရပါတယ်။

မဲဆောက်ဈေးထဲနဲ့ အနီးဝန်းကျင်းမှာ ဖွင့်လှစ်ရောင်းချနေတဲ့ မြန်မာစားသောက်ကုန်ပစ္စည်းရောင်းတဲ့ ဈေးဆိုင်တွေ ငွေလွှဲ ၊ ငွေလဲ လုပ်ငန်းလုပ်ကိုင်တဲ့ဆိုင်တွေ ၊ မြန်မာပြည်ကိုဖုန်းဆက်လို့ရတဲ့ ဆိုင်တွေ၊ မြန်မာ ဆံပင်ညှပ်အလှပြင်၊ ဓါတ်ပုံရိုက် ကော်ပီကူး ပရင့်ထုတ်ပေးတဲ့ ကွန်ပျူတာ ဒယ်ဂျစ်တယ် စတဲ့ ပစ္စည်းတွေနဲ့ အခကြေးငွေယူပြီး ၀န်ဆောင်လုပ်ကိုင်ပေးနေတဲ့ မြန်မာ ဆိုင်တွေ လမ်းဘေး ဟင်းသီးဟင်းရွက်ရောင်းချသူတွေ၊ အဆင်သင့်စားသောက်နိုင်တဲ့ တိုဟူးသုတ်၊ ပဲသုတ်မှသည် ၀တ်သားဒုတ်ထိုးဆိုင်လေးတွေလည်း ဇူလိုင်လ (၂၇)ရက်ကတည်းက ဆိုင်ဖွင့်လှစ်ရောင်းချတာတွေ မရှိတော့တာကို တွေ့ရပါတယ်။

ပုံမှန်ရက်တွေမှာ တနေ့ကို ဘတ်ငွေ တစ်သောင်းဖိုးလောက် အရောင်းအ၀ယ်ဖြစ်နေတာကနေ အခုရက်ပိုင်းအတွင်း ဘတ် တစ်ထောင်ကျော်ဖိုးရဖို့ ည (၉)နာရီထိုးတဲ့အထိ စားသောက်သူတွေကို စောင့်ပြီး ရောင်းချနေတာတောင် ကိုယ့်ရင်းထားတဲ့ ငွေတောင်ပြန်မရတဲ့အခြေအနေရယ်၊ နောက် မြန်မာဈေးရောင်းနေတဲ့ ဆိုင်တွေကို အဖွဲ့စုံ ၀င်ပြီး စစ်မယ် ဖမ်းမယ်ဆိုတာကြောင့် ဆိုင် ပိတ်ထားလိုက်ရတာဖြစ်ကြောင်း ထိုင်းနိုင်ငံထုတ် အချိုရည်မျိုးစုံ၊ ဘီယာ၊ အရက်နဲ့ ထမင်းဟင်းရောင်းချနေတဲ့ မြန်မာနိုင်ငံသားဆိုင်ပိုင်ရှင်းကပြောပါတယ်။
အခုရက်ပိုင်းအတွင်း ဈေးရောင်းချရတဲ့အခြေအနေကိုတော့မြန်မာပြည်သားထမင်းဆိုင်ပိုင်ရှင်က “ ကျီးလန့်ဆန်စား ဆိုတာ တကယ်မှန်တယ် သတင်းတွေကလည်း မျိုးစုံအောင်ကြားနေရတယ် ထိုင်းအဖွဲ့စုံက ၀င်ရောက်စစ်ဆေးတော့မယ် အဖမ်းအဆီးတွေလည်းရှိနေတယ်ဆိုတော့ ဆိုင်တော့မပိတ်တော့ပါဘူး ကိုယ်ကဈေးရောင်းစားတာဘဲဟာ မကောင်းတဲ့ ပြစ်မှုကျူးလွန်တဲ့အလုပ်မျိုးမဟုတ်တော့ ၀င်စစ်ဆေးတော့လည်း ဖြေရှင်းမယ်ဆိုပြီးတော့ ဆိုင်ဖွင့်ထားတယ် ဈေးရောင်းရတာကတော့ အရင်ကလောက်မကောင်းတော့ဘူး လူကိုရှင်းပြီး လူသွားလူလာတောင်မရှိသလောက်ပြတ်နေတာ (၃)ရက်လောက်ရှိနေပြီ” ဟုပြောပါတယ်။

အဖမ်းအဆီးသတင်းတွေကြောင့် ဈေးရောင် ဈေးဝယ်တဲ့ သူတွေနည်းပါးပြီး ဆိုင်ကယ် (Taxi)ဆွဲစားတဲ့သူတွေ စက်ဆန်မလော့ မောင်းတဲ့သူတွေလည်း ခရီးသည်မရတဲ့အတွက် ၀င်ငွေနည်းလာပြီး မိသားစု စားဝတ်နေရေး ထိခိုက်မှုတွေရှိနေတယ်လို့သိရပါတယ်။

ထိုင်းနိုင်ငံတွင်းမှာ နိုင်ငံခြားသားအလုပ်သမားတွေအတွက်ပြုလုပ်ပေးတဲ့ ပန်းရောင်ကဒ်လို့ခေါ်တဲ့ (၂)နှစ်သက်တမ်း အလုပ်သမားလက်မှတ်လုပ်ပေးတာတွေဟာ ဇူလိုင်လ (၂၉)ရက်နေ့ ကို နောက်ဆုံးရက်အဖြစ် တရာဝင် ထိုင်းအလုပ်သမားဝန်ကြီးဌာနက သက်မှတ်ထားတာဖြစ်ပါတယ်။ အဲဒီရက် နောက်ပိုင်း ထိုင်း စစ်တပ်အပါအ၀င် ရဲ၊ လ၀ကနဲ့ ဒေသတွင်း အုပ်ချုပ်ရေးတာဝန်ရှိသူတွေ အဖွဲ့စုံက စစ်ဆေးဖမ်းဆီးမှုတွေစတင်တော့မှာဖြစ်ပါတယ်။

ဇူလိုင်လ ၂၈ရက်နေ့ မနက်အစောပိုင်းမှာ ထိုင်း-မြန်မာနယ်စပ် ထာ့ဆိုင်လုတ်ရပ်ကွက်အတွင်းက သောင်ရင်းမြစ်ကမ်းနား ကုန်တင်ကုန်ချလုပ်တဲ့ နေရာက တဲအိမ်စုတွေကို ထိုင်းစစ်တပ်နဲ့အဖွဲ့စုံက ၀င်ရောက်စီးနင်းပြီး မြန်မာရွှေ့ပြောင်းအလုပ်သမား (၈၉)ဦးကို ဖမ်းဆီးခဲ့တယ်လို့ စုံစမ်းသိရှိရပါတယ်။
အလာတူ ဇူလိုင်လ ၂၃ရက်နေ့ မနက်အစောပိုင်းမှာလည်း ဆာသူလေး (Hsa Thoo Lei) ကျောင်းအနီးက မြန်မာရွှေ့ပြောင်းအလုပ်သမားတွေနေထိုင်တဲ့နေရာတွေကို ၀င်ရောက်ဖမ်းဆီးတာတွေလည်း ရှိခဲ့ပါတယ်။

Thursday, July 07, 2016

စံပယ်ဖြူနေ့ကလေးထိန်းကျောင်းအတွက် ကစားစရာအရုပ်တွေ ကနေဒါနိုင်ငံသားလှူဒါန်း

 
၆ ဇူလိုင် ၂၀၁၆
ရောင်ခြည်ဦးအလုပ်သမားများအဖွဲ့က တည်ထောင်ထားတဲ့ မယ်တောင်ဖက် ကျေးရွာ ဖတောင်းရပ်ကွက်မှာရှိတဲ့ စံပယ်ဖြူနေ့ကလေးထိန်းကျောင်းမှာ တက်ရောက်နေတဲ့ ကလေးငယ်တွေအတွက် ကစားစရာအရုပ်မျိုးစုံကို ကနေဒါနိုင်ငံသား Stephen Campbell (ခ) ကိုစိုးစံက လှူဒါန်းခဲ့ပါတယ်။
 
စံပယ်ဖြူနေ့ကလေးထိန်းကျောင်းမှာရှိတဲ့ ကလေးများအတွက် ကိုစိုးစံ ခေါ် Stephen Campbell လှူဒါန်းတဲ့အရုပ်တွေကတော့ သိုးမွှေးရုပ်၊ ကော် ရုပ် စတဲ့ကစားအရုပ်ပေါင်း (၂၀)ကျော် လှူဒါန်းတာဖြစ်ပါတယ်။

ကိုစိုးစံ လှူဒါန်းတဲ့ ကလေးကစားစရာအရုပ်တွေကို စံပယ်ဖြူနေ့ကလေးထိန်းကျောင်း ကျောင်းအုပ်ဆရာမကြီး ဒေါ်မြတ်မြတ်ထက်က လက်ခံယူခဲ့တာဖြစ်ပါတယ်။ စံပယ်ဖြူနေ့ကလေးထိန်းကျောင်းမှာ ကလေးငယ် (၂၂)ရောက် တက်ရောက်နေတာဖြစ်ပါတယ်။

Tuesday, July 05, 2016

လူ့အခွင့်အရေး၊ အလုပ်သမားအခွင့်အရေး၊ လိင်နှင့်လိင်ကွဲပြားမှုအခြေပြုသင်တန်းပြုလုပ်



လူ့အခွင့်အရေး၊ အလုပ်သမားအခွင့်အရေး၊ လိင်နှင့်လိင်ကွဲပြားမှုအခြေပြုသင်တန်းကို ရောင်ခြည်ဦးအလုပ်သမားများအဖွဲ့က ဦးဆောင်ပြီး ရောင်ခြည်ဦး၏ခေတ္တခိုလှုံရာနေအိမ်၌ ဇူလိုင်လ ၂ ရက် နေ့ကနေ ၄ရက်နေ့အထိ (၃)ရက်ကြာ ပြုလုပ်ခဲ့ပါတယ်။


အဆိုပါ သင်တန်း ပထမရက်တွင် လူ့အခွင့်ရေးဆိုင်ရာများကို ကိုမျိုးကိုက ဦးဆောင် သင်တန်းပေးခဲ့တာဖြစ်ပြီး ဒုတိယနေ့တွင် ရွှေ့ပြောင်းအလုပ်သမားအခွင့်အရေးသင်တန်းကို ကိုစိုးမိုးက သင်တန်းမှူးအဖြစ် ဦးဆောင် ပြုလုပ်ခဲ့ခြင်းဖြစ်သည်။ သင်တန်းနောက်ဆုံးနေ့ဖြစ်သည့် တတိယနေ့တွင် သင်တန်းဆရာမ မသူဇာကြိုင်က ဦးဆောင်ကာ လိင်နှင့်လိင်ကွဲပြားမှုအခြေပြုသင်တန်းနှင့် လူ့အခွင့်အရေးတို့ကို ဆက်လက်သင်ကြားခဲ့ခြင်းဖြစ်ပါတယ်။


 လူ့အခွင့်အရေး၊ အလုပ်သမားအခွင့်အရေး၊ လိင်နှင့်လိင်ကွဲပြားမှုအခြေပြုသင်တန်းသို့ ရွှေ့ပြောင်းမြန်မာအလုပ်သမား ၁၄ ဦး တက်ရောက်ခဲ့ကြပါတယ်။

ကျောင်းသားမိဘ ကော်မတီ အစည်းအဝေးကျင်းပ


ထိုင်း-မြန်မာနယ်စပ် မယ်တောင်ဖက်ကျေးရွာ ဖတောင်းရပ်ကွက်မှာရှိတဲ့ စံပယ်ဖြူနေ့ကလေးထိန်းကျောင်းမှာ ကျောင်းသားမိဘကော်မတီအစည်းအဝေး တရပ် ကို ဇူလိုင်လ (၃)ရက်နေ့ ညနေပိုင်းမှာ ကျောင်းကြီးကြပ်ရေးမှူးနဲ့ ကျောင်းအုပ်ဆရာမကြီးတို့က ဦးဆောင်ပြီး ပြုလုပ်ခဲ့ပါတယ်။

ကျောင်းသားမိဘကော်မတီအစည်းအဝေးမှာ ကျောင်းသားမိဘ (၂၅ ) တက်ရောက်ခဲ့တာဖြစ်ပြီး ကျောင်းသားကလေးငယ်တွေအတွက် ကျောင်းဝတ်စုံ သတ်မှတ်ဝတ်ဆင်ရေး၊ ကျောင်းသားမိဘအမည်လိပ်စာတွေပါဝင်တဲ့ ကျောင်းသားကဒ်လုပ်ဆောင်ပေးဖို့၊ ကျောင်းသန့်ရှင်းရေးနဲ့ ကလေးကစားကွင်း ပြင်ဆင်ပေးဖို့ ၊ ကျောင်းမှာ ကျောင်းသားမိဘတွေအပါအ၀င် ဒေသတွင်းမှာရှိတဲ့ စက်ရုံ အလုပ်ရုံတွေက အလုပ်သမားတွေစုပေါင်းပြီး ၀ါဆိုသင်္ကန်းကပ်လှူရေးကိစ္စတွေကို ဆွေးနွေးခဲ့ကြတာဖြစ်ပါတယ်။

ကလေးတွေအတွက် ကျောင်းဝတ်စုံဆိုတာကတော့ ပုံမှန်ကျောင်းတက်ဝတ်စုံနဲ့ အားကစားဝတ်စုံ နှစ်စုံ သတ်မှတ်ဝတ်ဆင်ဖို့နဲ့ ကျောင်းသားကလေးတွေ စနစ်တကျ ကျောင်းတက်ရောက်မှုရှိစေရန် ကျောင်းသားမိဘတွေရဲ့ လက်ရှိနေတဲ့လိပ်စာနဲ့ ဖုန်းနံပါတ်တွေကောက်ယူပြီး ကျောင်းသားကဒ်ထုတ်ပေးဖို့အတွက် အဓိကထားကာ ကျောင်းသားမိဘကော်မတီအနေနဲ့ ဆွေးနွေးသဘောတူညီချက်တွေ ရယူခဲ့တာဖြစ်တယ်လို့သိရပါတယ်။

စံပယ်ဖြူနေ့ကလေးထိန်းကျောင်းကို မဲဆောက်မြို့အခြေစိုက် ရောင်ခြည်ဦးအလုပ်သမားများအဖွဲ့က (၂၀၀၉) ခုနှစ်မှာ စတင်တည်ထောင်ခဲ့တာဖြစ်ပါတယ်။
တည်ထောင်ရတဲ့ ရည်ရွယ်ချက်နဲ့ပတ်သက်လို့ ' ရွေ့ပြောင်းကလေးငယ်များဘ၀ လုံးခြုံတိုးတက်စေဖို့နဲ့ ကလေးငယ်တွေရဲ့ မိဘတွေ လုပ်ငန်းခွင်မှာ နောက်ဆံမတင်းရဘဲ လွတ်လွတ်လပ်လပ် အလုပ်လုပ်ကိုင်နိုင်ဖို့ ရည်ရွယ် ပြီး စံပယ်ဖြူနေ့ကလေးထိန်းကျောင်းကို ဖွင့်လှစ်ခဲ့တာ" လို့ ကျောင်းကြီးကြပ်ရေးမှူး ကိုဟိန်းကပြောပါတယ်။

စံပယ်ဖြူနေ့ကလေးထိန်းကျောင်းမှာတော့ လက်ရှိမှာ အသက် တနှစ်ခွဲကနေ (၄)နှစ်အတွင်းက မြန်မာရွှေ့ပြောင်း မိဘတွေရဲ့ ရင်သွေးငယ် (၂၅)ယောက်ကို စနစ်တကျ ပြုစုစောင့်ရှောက်ကာ မူလတန်းပညာရေးကို တက်လှမ်းနိုင်ဖို့ ပြင်ဆင်ပေးနေတာဖြစ်ပါတယ်။ နှစ်စဉ် ကလေးငယ် (၄)ယောက်ကနေ (၆)ယောက်လောက်ကို မူလတန်းအဆင့်ပညာသင်ကျောင်းကို လွဲပြောင်းအပ်နှံပေးတာမျိုးတွေကိုလည်း ဆောင်ရွက်ပေးတယ်လို့ သိရပါတယ်။

စံပယ်ဖြူနေ့ကလေးထိန်းကျောင်းမှာ ကလေးငယ်တွေ ပျော်ရွှင် ကျန်းမာပြီး ကာယ ဉာဏ နှစ်ရပ်စလုံး ဖွံ့ဖြိုး တိုးတက်စေဖို့ ကျောင်းဆရာမ (၂)ဦး နဲ့ သင်ထောက်ကူ (၁)ဦးအပါအ၀င် ကျောင်း ကြီးကြပ်ရေးမှူးတို့ က ဆောင်ရွက်နေကြောင်း သိရပါတယ်။